Gjatë konferencës së mbajtur ditën e sotme së bashku me presidenten e Hungarisë Katalin Novak, Presidenti Bajram Begaj është pyetur lidhur me rritjen e pagave për deputetët dhe ministrat.
Begaj gjatë fjalës së tij tha se nuk ishte një vendim i deputetëve, por një ligj i votuar me shumicë dhe konsensus.
Sipas tij ligji në fjalë bëhet për të rregulluar piramidën e pagave në vend, në administratën e lartë publike dhe pagat e magjistratëve.
Ai ka dhënë dakordësinë e tij, duke shtuar se për këtë vendim ka marrë të gjithë kohën e nevojshme për ta vlerësuar si duhet me ekspertët e fushës përkatëse.
“Në fakt nuk shkon me frymën e kësaj konference. Presidenti në fakt zbaton kushtetutën dhe ligjet e vendit. Dua të sqaroj që nuk ishte një vendim i deputetëve, Ishte një ligj i votuar me shumicë dhe konsensus. Ligji në fjalë bëhet për të rregulluar piramidën e pagave në vend, në administratën e lartë publike dhe pagat e magjistratëve. Përmendët që u lexua dakordësia e presidentit.
Ligji studiohet, vlerësohet nga deputetët. Presidenti ka dhënë pëlqimin paraprak që ligji të hyjë në fuqi pas dekretimit por jo përmbajtjen e ligjit. Presidenti ka marrë kohën e vet në momentin që erdhi. Kam marrë ditët që më ka dhënë kushtetuta për ta vlerësuar si duhet ligjin nga ekspertët e ekonomisë. Nuk është dhënë miratimi paraprak për ligjin. Është dhënë dakordësia për hyrjen në fuqi të ligjit në momentin e dekretimit”, ka thënë Begaj.
