Kryetari i Kuvendit, Gramoz Ruçi në një mesazh ngushëllimi për ndarjen nga jeta të skenaristit dhe regjisorit Kujtim Gjonaj, e quan këtë të fundit një ndër krenaritë artistike të Tepelenës dhe gjithë Shqipërisë.
Ruçi thotë se Gjonaj e ngriti në art thjeshtësinë dhe bukurinë e jetës.
“Kujtim Gjonaj ishte dhe do të mbetet një ndër krenaritë artistike të Tepelenës dhe gjithë Shqipërisë. Skenarist, regjisor, producent, botues, Mjeshtri i Madh, enciklopedisti Kujtim Gjonaj, ishte ndër kronikanët dhe dokumentuesit më profesionistë të jetës dhe të botës shqiptare. Për rreth gjysëm shekulli, ai krijoi, dokumentoi, drejtoi, prodhoi dhe botoi vepra dokumentare dhe artistike që kanë hyrë në thesarin kulturor dhe janë bërë pjesë e kujtesës kolektive, artistike dhe historike të shqiptarëve. Me krijimtarinë e tij origjinale, Gjonaj ngriti në art dhe na përcollli ne, shqiptarëve, por edhe kulturës botërore, detajet dhe episodet e jetës, historisë dhe figurave të saj, kulturës, aspiratave, përjetimeve dhe ëndrrave të shqiptarëve”, shkruan në mesazhin e tij kreu i Kuvendit.
