Një pilot ka humbur jetën si pasojë e përplasjes së një avioni luftarak Su-25, i cili u rrëzua në jug të rajonit Stavropol të Rusisë. Lajmi është dhënë nga Ministria e Mbrojtjes, e cila konfirmon se avioni u rrëzua gjatë trajnimit, jo shumë larg aeroportit të Budennovsk. "Sot avioni luftarak Su-25 u rrëzua gjatë trajnimit jo shumë larg aeroportit të Budennovsk. Stervitja ishte zhvilluar pa municion, ndërsa avioni u rrëzua në një zonë jo të banuar, duke mos shkaktuar viktima të tjera. Një komision i posaçëm është ngritur për të hetuar incidentin." – thuhet në deklaratën e Ministrisë së Mbrojtjes.