Presidenti i Ukrainës, Volodymyr Zelensky, ka kërkuar një “reagim të fuqishëm” nga partnerët perëndimorë, pas intensifikimit të sulmeve ruse, duke përfshirë bombardimet në një spital ushtarak në Harkiv dhe sulmet ajrore në Dnipro e Krivi Rih.
“Këto nuk janë vetëm sulme ndaj civilëve ukrainas, por edhe ndaj përpjekjeve ndërkombëtare për paqe,” tha Zelensky në fjalimin e tij të përnatshëm. Ai theksoi se Rusia po sfidon diplomacinë ndërkombëtare dhe se një përgjigje e fortë është urgjente, veçanërisht nga SHBA dhe Evropa.
Ukraina raportoi viktima pas një sulmi rus me dronë në një spital ushtarak në Harkiv, ndërsa në Dnipro, një sulm me mbi 20 dronë Shahed vrau katër persona dhe plagosi 25 të tjerë, mes tyre një grua shtatzënë. Po ashtu, shtatë persona u plagosën nga një sulm me raketa në Krivi Rih.
Ndërkohë, Rusia pretendon se ka marrë nën kontroll dy fshatra në rajonet e Zaporizhjas dhe Donjeckut, por këto deklarata nuk janë verifikuar ende.
