Kryetarja e bashkisë së Durrësit Emiriana Sako ka thirrur sot në një mbledhje urgjente Komitetin Drejtues për bashkërendimin e veprimtarisë së institucioneve përgjegjëse në nivel vendor, dhe referimin e rasteve të dhunës në familje.
Fokusi i mbledhjes ka qenë koordinimi i planit të ndërhyrjes për të mbështetur nevojat e familjes së Bedrie Lokës, gruas që humbi jetën në ditët e para të këtij viti në NJA Sukth.
“Në qendër të diskutimeve me të pranishmit, drejtues të instituconeve të rëndësishme rajonale e lokale si dhe drejtues të organizatave të shoqërisë civile, u vendos forcimi i masave për mbrojtjen e viktimave”,- shkruan ndër të tjera Sako në postimin në rrjete sociale.
Postimi i plotë:
Thirra sot mbledhjen urgjente të Komitetit Drejtues për bashkërendimin e veprimtarisë së institucioneve përgjegjëse në nivel vendor, dhe referimin e rasteve të dhunës në familje.
Në qendër të diskutimeve me të pranishmit, drejtues të instituconeve të rëndësishme rajonale e lokale si dhe drejtues të organizatave të shoqërisë civile, u vendos forcimi i masave për mbrojtjen e viktimave. Duke marrë shkas nga ngjarja tragjike e humbjes së jetës së një gruaje nga Njësia Administrative Sukth, vura theksin në aksesin në shërbime cilësore e gjithëpërfshirëse për viktimat e dhunës në familje si dhe në forcimin e mekanizmave në nivel lokal.
Bashkia Durrës nëpërmjet shërbimeve sociale dhe gjithë kapaciteteve të saj do të jetë pranë familjes së viktimës. Në bashkëpunim me institucionet anëtare të mekanizmit koordinuam planin e ndërhyrjes për të mbështetur nevojat e familjes me shërbimet e nevojshme dhe përshpejtimn e procedurave si dhe për mbështetjen maksimale të fëmijëve.
