Policia kufitare italiane (Guardia di Finanza) ka njoftuar një tjetër sekuestrim të madh të drogës në portin e Gioia Tauro, në Kalabri, ku janë gjetur dhe konfiskuar mbi 435 kilogramë kokainë me pastërti të lartë, me vlerë të konsiderueshme në tregun e zi, rreth 70 milionë euro.
Ngarkesa e paligjshme u zbulua gjatë një operacioni të gjerë të autoriteteve anti‑drogë, që shënjon edhe një goditje të rëndësishme kundër rrjeteve të krimit të organizuar që trafikohet substanca narkotike nëpër porte drejt Evropës.
Droga ishte fshehur brenda një kontenieri me rreth 1,000 qese kikirikësh, me origjinë nga Amerika Latine dhe e destinuar për tregjet e Evropës Lindore, sipas informacionit zyrtar të Guardia di Finanza.
Njësitë me qen të trajnuar luajtën një rol kyç në zbërthimin e kontenierit, duke identifikuar anomalitë që çuan drejt zbulimit të kokainës. Autoritetet e cilësuan operacionin si një goditje të rëndë kundër fitimeve të paligjshme të organizatave kriminale.
Vetëm gjatë këtij viti, në portin e Gioia Tauro janë sekuestruar më shumë se 5 tonë drogë, me një vlerë totale që arrin afërsisht 650 milionë euro, nënvizuan më tej burimet zyrtare.
