Dy këngëtarët më të përfolur për një marrëdhënie të ngushtë mes tyre, Seldi Qalliu dhe Sinan Hoxha, nuk kishin deklaruar më parë se çfarë ndodhi që raporti i tyre u ndërpre. Edhe pse u kthyen në kryefjalë mediatike për arsyet e ndarjes, si duket, vetëm tani erdhi koha që të dy të tregojnë si qëndron e vërteta, pse janë përfolur kaq shumë për ndarje dhe si erdhi ribashkimi.

Në një intervistë për Prive, Seldi dhe Sinani tregojnë pas një faze reflektimi atë që ka ndodhur mes tyre gjatë këtyre viteve, pas 3 bashkëpunimeve të suksesshme.

Sinani thotë se gjithçka ka ndodhur mes tyre, në fakt, është ekzagjeruar: “Ka pasur një tërheqje në fakt, në atë kohë, të Seldit nga skena artistike. Pasi mbaroi Akademinë e Arteve për kanto, djali bëri edhe një kurs në Amerikë dhe ky ka qenë një shkak pauze në atë kohë nga ana e Seldit. Mirëpo portalet e morën si një prishje, si një grishje, derisa shkruan atë që u pëlqeu atyre, gjë që është e drejtë e tyre. Por ndërpreja e bashkëpunimeve erdhi pas 2-3 bashkëpunimeve. S’mund të ishim në çdo duet bashkë…” – tregon Sinani, por nuk e mohon se në të vërtetë, mes tyre ka ndodhur një grindje dhe fajtori për këtë ka qenë Seldi.

 “Sigurisht, një grindje e vogël ka ndodhur mes nesh, por nuk është e atij rangu që kanë shkruar portalet, por një neglizhencë artistike nga ana e Seldit. Ndoshta edhe kërkimi i llogarisë nga ana ime…”

Dhe këtë e miraton edhe Seldi, i cili tregon se ishte mosha ajo që e çonte të neglizhonte karrierën dhe famën:

“Faktikisht përgjigje presin shumë njerëz, por në kohën kur u bë bashkëpunimi me Sinanin “Adrenalina”, unë po mbaroja Akademinë dhe pas saj, duhet të bëja edhe një Master. Mirëpo, nga angazhimet e shumta, e lashë pak pas dore. Edhe neglizhenca ime për shkak të moshës, si çdo i ri ishte ndikoi në atë kohë. Këtu filloi edhe ngërçi që filluan të shkruajnë të gjithë…. Në atë kohë shkova për një periudhë 8-mujore në Amerikë për Master. Ajo lëvizje, ndoshta nuk më bëri mirë për karrierën, por më bëri mirë mua, për të reflektuar…”

Së shpejti, Seldi dhe Sinani do të sjellin një bashkëpunim të ri, ndaj raporti i tyre tashmë i ka kaluar të gjitha ngërçet.