DURRËS, 16 maj 2013 –Në vitet 1960 në Shqipëri qarkullonte anekdota se durrsakët presin të ngrijë deti të shkojnë me nallane në Itali (thënia i atribuohej të famshmit humorist popullor, durrsakut tipik, berberit të nderuar Osman Rexha).

Kur kryeministri shqiptar Sali Berisha deshi të tallej me durrsakët 50 vjet më vonë, më 14 maj 2013, se “me reforma të thella do heqim vizat me Shtetet e Bashkuara të Amerikës dhe ju do lëvizni të lirë në mbarë botën”, nuk kaluan as 24 orë dhe përfaqësia diplomatike e Uashingtonit në Tiranë bëri të qartë se nuk ka ngrirë ende Atlantiku për të shkuar me nallane (po një anekdotë popullore shqiptare fjalën “Amerikë” e përkthen me “hA–merr-ik-ë”)!

Hakmarrje “e ëmbël” në emër të të ndjerit Osman Rexha.

Populli shqiptar ka një thënie të urtë për ata që shohin ëndrra me sy hapur, apo që dëshirojnë të bëjnë gjëra të pamundura: “Hip këtu (në majë të gishtit të shkurtër) të shohësh Stambollin (ishte “Uashingtoni” otoman)!”.

Në ambasadën amerikane e kanë mësuar goxha mirë gjuhën shqipe dhe dinë ta “përkthejnë” idiomën e vjetër për Stambollin: “Ligji aktual (amerikan) kërkon që vendet të kenë një nivel refuzimi vizash për vizitorë prej më pak se tre për qind dhe të hyjnë në marrëveshje për të bashkëndarë mes tyre të dhëna për udhëtarë që paraqesin rrezik për Shtetet e Bashkuara, ndër kërkesa të tjera. Niveli i refuzimit në Shqipëri për vitin fiskal 2012 ishte 40.5 për qind”.

Nga ana tjetër, Kryeministri dhe njëkohësisht kryetar i PD-së, është i informuar se ndonjërit prej kandidatëve të djathtë për deputet në qarkun e Durrësit i është refuzuar viza amerikane edhe kur ishte dikur deputet.

Është për t’u vënë në dukje fakti se i vetmi ambasador në Tiranë që nuk i ka bërë ende vizitë kortezie z. Aldo Bumçi me rastin e emërimit Ministër i Punëve të Jashtme të Shqipërisë, është ai amerikan, z. Aleksandër Arvizu.

Ja 37 shtetet, qytetarët e të cilëve mund të hyjnë në SHBA pa vizë

01. Andorra

02. Australia

03. Austria

04. Belgjika

05. Britania e Madhe

06. Brunei                

07. Çeke (Republika)

08. Danimarka                             

09. Estonia                

10. Finlanda

11. Franca                                                       

12. Greqia

13. Gjermania

14. Holanda     

15. Hungaria

16. Irlanda

17. Islanda

18. Italia

19. Japonia

20. Koreja e Jugut

21. Letonia

22. Lihtenshtejni

23. Lituania

24. Luksemburgu

25. Malta

26. Monako

27. Norvegjia

28. Portugalia

29. San Marino

30. Singapori

31. Sllovakia

32. Sllovenia

33. Spanja

34. Suedia

35. Tajvani

36. Zelanda e Re

37. Zvicra

/th. m. Agjencia e lajmeve “Dyrrah”/