Dy ligjvënës amerikanë kanë paraqitur një propozim për t’i dhënë Presidentit Donald Trump autoritetin për të transferuar në Izrael bombardues të fshehtë B-2 dhe bomba kundër bunkerëve.
Ata janë demokrati Josh Gottheimer nga Nju Xhersi dhe republikuani Mike Laëler nga Nju Jorku.
Nëse miratohet, ‘Akti Bunker Buster’ do t’i lejonte Trumpit të ndërmarrë hapa për të siguruar që Izraeli të jetë i përgatitur për çdo skenar, veçanërisht në rast se Irani përpiqet të zhvillojë armë bërthamore.
Pilotët e bombarduesve B-2 hodhën 14 bomba shpërthyese kundër bunkerëve mbi tre objektet kryesore bërthamore të Iranit, në një veprim që Trump pretendon se “eliminoi plotësisht” programin bërthamor të regjimit iranian.
Nga ana e tij, Izraeli ka goditur një numër instalimesh iraniane dhe ka vrarë zyrtarë të lartë ushtarakë, por nuk disponon bomba shpërthyese kundër bunkerëve.
Që nga viti 2024, SHBA kanë në dispozicion 19 avionë B-2.
“Irani, sponsori kryesor shtetëror i terrorizmit dhe një nga armiqtë më të mëdhenj të Amerikës, nuk duhet të ketë kurrë armë bërthamore.
Kjo është arsyeja pse unë mbështeta fuqimisht veprimet tona ushtarake në fillim të këtij muaji.
Irani ka vrarë dhjetëra amerikanë, përfshirë ushtarakët tanë, dhe ka sulmuar vazhdimisht aleatin tonë kryesor demokratik, Izraelin.
Izraeli duhet të jetë në gjendje të mbrohet kundër Iranit dhe të pengojë rindërtimin e kapaciteteve bërthamore iraniane,” tha Gottheimer në një deklaratë.
“Ky projektligj i jep presidentit autoritetin për të pajisur Izraelin me mjetet dhe trajnimin e nevojshëm për të penguar Teheranin dhe për të bërë botën më të sigurt,” shtoi Lawler.
