Shtetet e Bashkuara të Amerikës pretendojnë se kanë prova se Hamasi po përdor spitalin Al Shifa, më i madhi i Gazës, për të kryer veprime ushtarake.
“Ne kemi informacione që konfirmojnë se Hamasi po e përdor atë spital të veçantë për një mënyrë komandimi dhe kontrolli”, kështu deklaroi zëdhënësi i Këshillit të Sigurisë Kombëtare të Shtëpisë së Bardhë, John Kirby.
“Ky është një krim lufte”, shtoi më tej ai duke pretenduar se objekti ndoshta po përdoret gjithashtu për të ruajtur armët.
Kur u pyet për provat për të mbështetur pretendimin, Kirby tha se “vjen nga një shumëllojshmëri burimesh të inteligjencës”, por nuk do të ishte më specifik.
Ai tha gjithashtu se këto veprime të supozuara nga Hamasi nuk e pakësojnë përgjegjësinë e Izraelit për të mbrojtur civilët.
“Ne nuk mbështesim goditjen e një spitali nga ajri. Spitalet dhe pacientët duhet të mbrohen. Shtetet e Bashkuara gjithashtu nuk duan të shohin “një zjarr në një spital”, u shpreh Kirby.
Forcat e Mbrojtjes të Izraelit besojnë se Hamasi fshihet në tunele nën spitale, por grupi e mohon këtë dhe thotë se Izraeli po synon civilët.
Një zyrtar i Hamasit tha këtë pasdite se 25 nga 35 spitalet në Gaza janë jashtë përdorimit që nga bombardimet dhe pushtimi tokësor i Izraelit në territorin e rrethuar.
