Humbja nga Barcelona në kohën shtesë të finales dramatike të Copa del Rey në Sevilla la një gjurmë të thellë në ekipin e Real Madridit, dhe duket se ka përçarje brenda dhomës së zhveshjes, shkruan Don Balon. Konkretisht, thuhet se pati një debat të nxehtë midis lojtarëve, madje edhe një sherr, ku Antonio Rudiger, Jude Bellingham dhe Vinicius Jr ishin kritikët më të zëshëm ndaj gjyqtarit, duke e akuzuar atë për humbjen. Një tjetër rrymë lojtarësh, përfshirë Luka Modric dhe Kylian Mbappe, mbështetën autokritikën, duke besuar se vetë skuadra është fajtore për dështimin. Portali spanjoll lançoi informacionin për konfliktin midis Modric dhe Rudiger në dhomën e zhveshjes, dhe kjo ndodhi pikërisht për shkak të shpërthimit të gjermanit të zemëruar ndaj gjyqtarit.
Modric ishte midis atyre që u përpoqën ta qetësonin ose kundërshtuan sjelljen dhe akuzat e tij kundër gjyqtarit. Kroati mbajti një qëndrim kundër hedhjes së fajit vetëm te gjyqtari, gjë që mund të kishte çuar në ngritjen e zërave në atmosferën e nxehtë të dhomës së zhveshjes, megjithëse nuk ka konfirmim për një përplasje të drejtpërdrejtë fizike nga burimet përkatëse. Le t’ju kujtojmë se, përveç faktit që trofeu i shpëtoi nga duart kryeqytetasve, fundi i ndeshjes së fundit në Sevilla u shënua nga skena të shëmtuara dhe kartonë të kuq. Përjashtimet e Rudiger, Bellingham dhe Lucas Vazquez pas fishkëllimës së fundit të gjyqtarit ishin vetëm kulmi i frustrimeve që kishin zier gjatë gjithë fundjavës.
