Daniel Santos është shkarkuar nga drejtimi i kombëtares së femrave të Luksemburgut pas disa denoncimeve për mesazhe të papërshtatshme ndaj lojtareve. Vendimi u njoftua nga Federata e Futbollit të Luksemburgut. Federata theksoi në një komunikatë se sjellja e raportuar bie ndesh me standardet etike dhe parimet e respektit që kërkohen në institucion. Sipas saj, masa u mor për të mbrojtur lojtaret dhe për të ruajtur integritetin e ambientit sportiv. Avokati i federatës, Marc Diederich, deklaroi se mesazhet dyshohet të jenë dërguar disa vite më parë dhe janë bërë publike vetëm së fundmi. Ai shtoi se mbetet e paqartë nëse akuzat do të sjellin pasoja ligjore për trajnerin e shkarkuar.