Shoku e la në makinën e rënë në përrua dhe e mori rrjedha, vijojnë kërkimet për trupin e 30-vjeçarit në Klos

Vijojnë kërkimet edhe sot për gjetjen e trupit të 30-vjeçarit Jurgen Karaj, të cilin dyshohet se e mori rrjedha e përroit në fshatit Dars të Klosit.

Ai ndodhej në automjet si pasagjer me shoferin 24-vjeçar, Andi Losha, kur mjeti kumbi kontrollin dhe ra në përrua. Losha arriti që të dalë nga makina dhe të mbijetojë, ndërsa 30-vjeçari dyshohet se është marrë nga rrjedha e ujit.

Për operacionin e gjetjes së trupit të tij, i përqëndruar pranë Urës së Halilit në Fullqet, sot marrin pjesë edhe Forcat e Armatosura, Forca Operacionale, Policia Ushtarake, Forca Bashkiake, MZSH e bashkisë Mat si dhe disa vullnetarë.

Sipas policisë, Losha u largua nga vendngjarja pa lajmëruar policinë dhe pa i dhënë ndihmë pasagjerit. Losha u arrestua nga policia dhe pas testit të alkoolit u konstatua se 24-vjeçari e kishte drejtuar mjetin në gjendje të dehur.