Vrasja e 22-vjeçarit shqiptar Andrea Ndoja, mbetet një krim me detaje ende konfuze. Dyshimi më i madh i hetuesve për tragjedinë e ndodhur dy ditë më parë në Sinalunga të Italisë fqinje është se 22-vjeçari i vrarë Andrea Ndoja mund të mos ishte në të vërtet objektivi i autorit Giulio Sale.
Mediet italiane, të cilat i referohen dëshmisë së 45-vjeçarit të dhënë nga dhoma e spitalit, raportojnë se Sale, i cili jetonte në Foiano, kishte bërë 8 kilometra rrugë për të shkuar në shtëpinë e mikut të viktimës, me të cilin kishte për qëllim të sqarohej.
45-vjeçari mësohet se kishte një “çështje të mbetur pezull” me shqiptarin dhe për këtë kishte shkuar në këmbë në shtëpinë e tij në Sinalunga, por pa mundur ta takojë.
Sipas versionit të dhënë nga 45-vjeçari, ai donte një sqarim për një përplasje të ndodhur disa muaj më parë në një lokal në Foiano, gjatë së cilit italiani pretendon se ishte dhunuar nga shqiptari. Edhe shqiptari mësohet se gjatë marrjes në pyetje ka deklaruar për një konflikt mes tij dhe italianit.
Kështu, Sale shoi në Sinalunga për t’u sqaruar. Rreth orës 21:30 të 9 majit, ai i ra ziles së banesës dhe derën e hapi një mik i shqiptarit, pikërisht 22-vjeçari Ndoja. Gjithnjë sipas versionit të dhënë nga 45-vjeçari italian, mes tij dhe të riut Ndoja kishte pasur një debat fillimisht verbal, por më pas i riu kishte nxjerrë pistoletën. Në atë pikë ata mësohet se janë përballur fizikisht dhe Sale i kishte marrë pistoletën nga dora duke shtënë në drejtim të të riut. Andrea Ndoja gjeti vdekjen nga një plumb i vetëm në qafë.
