Nga Thanas Mustaqi

Shteti shqiptar miraton në OKB rezolutë për Ditën botërore të prindërve, por nuk kujtohet të nderojë “heronjtë e ditëve tona”, ndërkohë që në të gjithë botën pati veprimtari.

Më 1 qershor politika shqiptare u shfaq në disa veprimtari kushtuar fëmijëve në ditën ndërkombëtare të tyre.

Nuk e politizuan, por deklarat e tyre në fundjavë përveç aspektit njerëzor dhe sentimental, pati dhe ngjyra “elektorale”.

Po diçka nuk shkon këtu, pasi 1 qershori i vitit 2013 duhet të shënonte fillimin e një tradite të re në kalendarin e festave që 1 qershori është dhe dita botërore e prindërve.

Në rezolutën e miratuar nga Asambleja e Përgjithshme e Kombeve të Bashkuara në mbledhje plenare e 130-të, më 17 shtator 2012, thuhet se 1 qershori shpallet dita botërore në nderim të prindërve në të gjithë botën (sh. faksimilen e rezolutës në anglisht).

Kjo rezolutë fton shtetet anëtare të OKB-së të festojnë ditën botërore të prindërve në kuadrin e marrëdhënieve të partneritet të gjithanshëm me shoqërinë civile, në veçanti me pjesëmarrjen e të rinjve dhe fëmijëve, për të marrë pjesë në veprimtaritë kushtuar kësaj Dite.

Ndërkohë, Vatikani i konsideroi prindërit ditën e 1 qershorit 2013 “heronj të ditëve tona”, në Pakistan, Afrikë, SHBA pati veprimtari, kurse Kremlini dekoroi nënat me shumë fëmijë.

Miratojmë 3 ligjet e BE-së, kërkojmë viza në SHBA, por nuk zbatojmë një rezolutë të OKB-së, që është një formë ndikimi për forcimin e familjes.

Dokument

Rezolutë e miratuar nga Asambleja e Përgjithshme e Kombeve të Bashkuara

Dita Botërore e Prindërve

Asambleja e Përgjithshme

1. vendos të shpallë 1 qershorin ditën botërore të prindërve, që do të festohet çdo vit në nderim të prindërve në të gjithë botën;

2. fton shtetet anëtare të festojnë ditën botërore të prindërve në kuadrin e marrëdhënieve të partneritet të gjithanshëm me shoqërinë civile, në veçanti me pjesëmarrjen e të rinjve dhe fëmijëve;

3. i kërkon Sekretarit të Përgjithshëm që për rezolutën aktuale të vihen në dijeni të gjitha shtetet anëtare, organizatat e sistemit të Kombeve të Bashkuara dhe organizatat e shoqërisë civile, me qëllim që në mënyrë të përshtatshme të marrin pjesë në veprimtaritë kushtuar kësaj Dite.

Mbledhja plenare e 130-të.

Më 17 shtator 2012.

/Agjencia e lajmeve “Dyrrah”/