Çrregullimi i gjakut që njihet ndryshe si hemofilia vazhdon të shënojë raste të reja në vendin tonë, ku çdo vit diagnostikohen mesatarisht 3 individë. Në Shqipëri bazuar në regjistrin kombëtar janë 254 pacientë me këtë sëmundje. Mjekja hematologe, Daniela Nika tregon dinamikën që ndjek hemofilia dhe çfarë ndodh kur ajo diagnostikohet vonë.
“Këta pacientë shpeshherë vijnë nga familje me histori hemorragjie kështu që familjet që kanë meshkuj me këto probleme janë përballur dhe e dinë, por ka edhe raste që e nënvlerësojnë diagnostikimin e hershëm të fëmijës. Kjo është një sëmundje që shkakton hemorragji të ndryshme në organe ose artikulacione, ndonjëherë, edhe në mënyrë spontane”.
Sipas specialistes, pacientët me këtë sëmundje gjenetikisht të trashëgueshme, mund të kurohen duke zëvendësuar faktorin 8 dhe 9 që ndodhet në gjak.
“Aktualisht jemi në një fazë që jo vetëm të mbulojmë të gjitha nevojat e trajtimit sipas nevojës, por edhe trajtimin profilaktik të fëmijëve, t’iu oforjmë ayre faktorin që iu mungon në kushte jo traume”.
Nga statistikat botërore aktualisht janë rreth 400 mijë pacientë që vuajnë nga sëmundja e hemofilisë në vende të ndryshme dhe shumica e personave të prekur janë meshkuj.
/Klan News
