Shtyrja e negociatave për në tetor është komentuar edhe nga kreu i PAA-së, Agron Duka. Në një postim në Facebook, Duka shkruan se lajmi i shtyrjes së negociatave është i mirë, “sepse vjeshta duhet të jetë një stinë e re politike për Shqipërinë. Por kjo stinë nuk mund të vijë me ata që morën me grusht shtetin, që blenë turpin e tyre (në Dibër e në Durrës, me gjasë në gjithë vendin), që kthyen sëprapthi çdo logjikë të shëndoshë politike, që kriminelin e bëjnë deputet dhe deputetët i bëjnë vartës të kriminelëve”.
Duka thekson se ndërsa energjitë e politikës duhet të ishin të fokusuara në sektorët strategjikë për zhvillimin e vendit dhe plotësimin e standarteve për hapjen e negociatave me BE, retorika politike është përqendruar në betejën me partinë që ka future krimin në institucionet shtetërore.
“Në një vend normal detyra e një politikani do të ishte të fliste për bujqësinë, arsimin, sigurinë dhe zhvillimin ekonomik etj. Por, prej të paktën 5 vitesh, të gjithë energjitë tona janë përthithur nga një betejë e pabarabartë me një grupim politik që ka ndërthurur institucionet shtetërore me botën e krimit”.
Statusi i plotë i Agron Dukës:
Edhe njëherë të ngelur për vjeshtë! Sigurisht jo shqiptarët, që e meritojnë prej shumë kohësh hapjen e negociatave, por kjo mazhoracë ilegjitime që sundon me krim dhe korrupsion. Sidoqoftë lajmi që vjen sot nga Brukseli është i mirë, sepse vjeshta duhet të jetë një stinë e re politike për Shqipërinë. Por kjo stinë nuk mund të vijë me ata që morën me grusht shtetin, që blenë turpin e tyre (në Dibër e në Durrës, me gjasë në gjithë vendin), që kthyen sëprapthi çdo logjikë të shëndoshë politike, që kriminelin e bëjnë deputet dhe deputetët i bëjnë vartës të kriminelëve.
Që Europa e re, e cila lindi nga votimet e fund-majit, të gjejë një Shqipëri të re, duhet të çojmë deri në fund betejën tonë për zgjedhje të lira dhe të ndershme, për një qeveri Tranzitore që t’i japë fund Tranzicionit dhe aventurierëve që përfitojnë prej tij.
Në një vend normal detyra e një politikani do të ishte të fliste për bujqësinë, arsimin, sigurinë dhe zhvillimin ekonomik etj. Por, prej të paktën 5 vitesh, të gjithë energjitë tona janë përthithur nga një betejë e pabarabartë me një grupim politik që ka ndërthurur institucionet shtetërore me botën e krimit. Që kjo simbiozë të shembet, që kjo jetesë e përbashkët e dy organizmave të rrezikshëm me dobi reciproke t’i hapë rrugën Shqipërisë europiane, që normaliteti të mbizotërojë në jetën tonë politike, duhet të bëhemi europianët e vetes. Duhet që të reagojmë ashtu sikurse do të reagonin të gjithë qytetarët perëndimorë përballë përgjimeve dhe një mazhorace ilegjitime, duhet të protestojmë dhe të jemi qëndrestarë deri në përmbushjen finale të aspiratave të të gjithë shqiptarëve të ndershëm, duke nisur nga 21 Qershori!
