Një 25-vjeçar shqiptar është arrestuar nga policia italiane në një motel në Romë, pasi dyshohet se gjatë një sherri me mikun e tij italian, e ka shtyrë këtë të fundit nga ballkoni e për pasojë ky i fundit ka humbur jetën.
Sipas mediave italiane, 27-vjeçari italian (viktima) Leonardo Florini dhe miku i tij shqiptar (me pasaportë italiane) Davis Stojanovic, kishin marrë një dhomë moteli me qira në katin e tretë në ‘Via di San Calepodio’, në lagjen Monteverde të Romës.
Sipas asaj që raportohet në media ngjarja e rëndë ndodhi mbrëmjen e djeshme, ndërsa u raportua nga banorët e zonës.
Kur policia mbërriti në vendngjarje gjeti të pajetë në rrugë 27- vjeçarin italian, ndërsa në dhomë ndodhej ende 25-vjeçari shqiptar, i cili ishte në gjendje të rënduar, pasi dyshohet se kishte përdorur lëndë narkotike.
Hetimet janë duke vazhduar për të përcaktuar rrethanat e sakta të incidentit. Karabinierët, që mbërritën në apartament, gjetën drogë.
Nga ajo që ka dalë deri më tani, duket se të rinjtë kishin marrë me qira një dhomë në B&B për tre ditë. Të dy janë me origjinë nga Isola del Liri në provincën e Frosinone. Viktima, Fiorini, punonte në një dikaster, shoku i tij i dhomës është nëpunës në një dyqan në qendër të qytetit. Të dy janë të fejuar, por partneret e tyre nuk ishin të pranishme mbrëmë në apartamentin ku karabinierët gjetën një sasi kanabisi.
25-vjeçari u dërgua në stacionin e policisë. Pas marrjes në pyetje, prokurori urdhëroi arrestimin e tij.
I dyshuari që identifikohet me origjinë shqiptare dhe shtetësi italiane sipas dokumenteve, është aktualisht në burg duke pritur një seancë dëgjimore për vërtetimin e fajësisë të planifikuar për ditët në vijim, para gjyqtarit hetues.
