Ajo shkroi për vrasjen e burrit kohë më parë dhe tani do të qëndrojë në burg përjetë pikërisht për vrasjen e bashkëshortit të saj.
Një gjykatës në Oregon e dënoi me burgim të përjetshëm shkrimtaren Nancy Crampton Brophy, e cila me sa duket e kishte parashikuar me detaje krimin e saj në librin me titull “Si të vrasësh burrin tënd”.
71-vjeçarja u shpall fajtore për vrasje muajin që shkoi dhe tani u dha dënimi, bashkëshorti i së cilës vdiq nga në plagë e shkaktuar me armë zjarri.
Gjykata doli në përfundimin se ajo e kishte qëlluar në 2018-n njeriun me të cilin kishte ndarë jetën për 26 vjet me qëllimin të përfitonte 1.5 milionë dollarë nga skema e sigurimeve. Përpara krimit, Crampton Brophy kishte bërë dhe disa botime të tjera, ndërsa në librin që u bë i famshëm përshkruante disa mënyra për të hequr qafe bashkëshortin përshirë armët e zjarrit, thikat, helmin dhe vrasësit me pagesë.
I shoqi, Daniel Brophy, ishte një kuzhinier dhe mësues i respektuar në Institutin Kulinar të Oregonit. Gjykatësit nuk e morën për bazë librin si provë në procesin e saj gjyqësor, pasi ai ishte shkruar vite përpara se të ndodhte krimi vërtet.
Por prokurorët nuk patën nevojë për të, sepse vërtetuan se Crampton Brophy kishte pasur motivin dhe mjetet e duhura për të vrarë të shoqin, teksa çifti po përjetonte një periudhë problemesh të mëdha financiare dhe mesa duket shkrimtarja kishte menduar të nxirrte ca para nga sigurimi i tij i jetës.
