Një 18 vjeçare me incialet K.Z ka rënë pre e një tentative për përdhunim nga pronari i butikut ku ajo ishte punësuar.

Ngjarja ka ndodhur në afërsi të Mulletit, disa muaj më parë, ku pronari Besim Lami 40 vjeçar ka ndaluar furgonin në të cilin të dy po udhëtonin dhe ka tentuar të kryejë marrëdhënie seksuale me dhunë me 18 vjeçaren.

Këtë të enjte prokuroria ka përfunduar hetimet ndaj Besim Lamit. Ai akuzohet për kryerjen e veprës penale “Marrëdhënie seksuale me dhunë me të rritura” mbetur në tentativë dhe “Marrëdhënie seksuale duke shpërdoruar detyrën” mbetur në tentativë.

"Nga këqyrja e bërë tek ajo ka rezultuar se rrobat e saj kanë qenë me baltë dhe pjesa e kyçit të dorës së djathtë ka patur gërvishje po ashtu edhe në pjesën e gjurit të djathtë. Me marrjen e njoftimit punonjësit e policisë kanë bërë të mundur gjetjen e personit nën hetim dhe nga këqyrja e bërë ka rezultuar se edhe ai ka patur rroba me mbetje balte.

Nga akti i ekspertimit kompjuterik rezulton se e dëmtuara gjatë komunikimeve të bëra me facebook me financieren, ata flasin në lidhje me gjendjen e mallit, për dhënien e faturave dhe për mënyrën që se si ka orientuar pronari i firmës për punën. Pra si i pandehuri ashtu edhe e dëmtuara ka punuar për llogari të shoqërisë.I pandehuri mohon faktin e kryerjes së veprës penale."-shkruhet në dosjen e prokurorisë.

Konkretisht në datën 22.01.2017 në mëngjes i pandehuri ka shkuar dhe e ka marrë me furgon pranë banesës së saj të dëmtuarën, pasi do të merrnin mall për ta shitur në Elbasan. Ata kanë shkuar tek butiku ku kanë marrë mallin, sipas faturës përkatëse në emër të shoqërisë dhe janë nisur për në Elbasan për ta shitur. Ata kanë lëvizur deri në Pogradec dhe më pas kanë lëvizur drej Tiranës. Gjatë kohës që ata kanë qenë në lëvizje kanë patur komunikime me financieren e shoqërisë, për problemet e punës.

Pasi kanë mbaruar, ata janë kthyer për në Tiranë. Në afërsi të vendit të quajtur Mullet, i pandehuri ka ndaluar furgonin, ka hapur krahun duke i thënë se do të pinte një cigare. Ai i ka ulur siguresat e dyerve dhe ka tentuar të kryejë marrëdhënie me të dëmtuarën jashtë vullnetit të saj. Ajo e ka kundërshtuar, e ka shtyrë dhe është shkëputur prej tij duke dalë në autostradë dhe i ka dalë para një automjeti. Makina e ka sjellë deri tek fakulteti ekonomik ku ndodhej një patrullë policie së cilës i ka treguar se çfarë i kishte ndodhur. Ajo ka bërë kallëzimin penal dhe ankimin përkatës. Ajo ka dhënë deklarime ku tregon rrethanat e sipërcituara.