Sindikata e pavarur e Arsimit ka zgjedhur që në ditën e punëtorëve të dalë në protestë, për të parashtruar kërkesat dhe pakënaqësitë e mësuesve.
"Mësuesit kërkojnë rritje rroge me 20%"; "Mësuesit meritojnë respekt dhe paga dinjitoze"; "Na ktheni regjistrin me nota", janë këto disa nga kërkesat e parashtruar në formën e pankartave në protestën e zhvilluar mëngjesin e sotëm përballë Ministria e Arsimit, Sportit dhe Rinisë.
Lidhur me këtë protestë, ka pasur edhe një reagim nga ana e Ministrisë, e cila thekson se ka dialog të vazhdueshëm me sindikatat për diskutimin e çështjeve të ndryshme si buxheti, nismat e reja dhe sidomos kontrata kolektive.
"Në kuadër të protestës së sotme para Ministrisë nga ana e Sindikatës së Pavarur të Arsimit, Ministria e Arsimit, Sportit dhe Rinisë (MASR) dëshiron të theksojë se protesta është një e drejtë dhe "1 Maji" është pikërisht dita kur ushtrohet kjo e drejtë nga sindikatat. Kontrata përfshin të gjitha kërkesat e sindikatave dhe jemi të lumtur që rritja e përvitshme e pagës së mësuesit do të reflektohet në pagën e prillit, të cilën çdo mësues/e do ta ketë në llogarinë e tij/saj duke filluar që nga dita e nesërme. Ndër të tjera, MASR i uron përzemërsisht 1 Majin të gjithë punëtorëve dhe sindikatave", shkruan MASR.
