Të paktën 100 persona kanë humbur jetën si pasojë e sulmeve të njëpasnjëshme në qytetet Homs dhe Damask, në Siri. 57 persona, shumica civilë, mbetën të vrarë pas shpërthimit me bombë të dy makinave. Mediat shtetërore publikuan pamjet tragjike menjëherë pas sulmit, ku duken njerëzit që largohen, makina të shkatërruara, tym dhe gjak në rrugë. Të paktën katër shpërthime u dëgjuan më vonë në jug të Damaskut, të cilat shkaktuan të paktën 50 të vdekur. Shteti Islamik mori përgjegjësinë e sulmeve në të dyja qytetet, të cilat prej kohësh kanë qenë në shënjestrën e organizatës terroriste. Homs është një nga qytetet e para në të cilat nisi edhe ofensiva e parë kundër presidentit Bashar Al Assad në vitin 2011, por që tashmë është nën kontrollin e forcave qeveritare. Sulmet ndodhën në një lagje kryesisht alevite, sekti i pakicës së cilës i përket presidenti Bashar Al Assad. Ndërkohë, sekretari amerikan i shtetit John Kerry ka thënë se një “marrëveshje e përkohshme” është arritur me Rusinë për një  armëpushim të pjesshëm në konflikt.