Këtë të mërkurë hyn në fuqi ora policore e vendosur dy ditë më parë nga Komiteti Teknik i Ekspertëve me qëllimi ndalimin e përhapjes së Covid-19 në vendin tonë.
Duke nisur nga ora 22:00 e mbrëmjes së sotme e deri në 06:00 të mëngjesit do të ndalohet qarkullimi i njerëzve, por dhe i mjeteve në rrugë pas kësaj ore, vetëm në raste pune apo emergjencave shëndetësore.
Në rast se kjo masë thyhet, masa administrative për të pabindurit do të jetë 10 mijë lekë të rinj. Në kuadër të masave kufizuese, në këtë fashë orare mbyllen edhe baret e restorantet do të jenë të mbyllura dhe do të punojnë me “delivery”.
Ndërsa për të gjithë sektorët që do të jenë në punë në këtë orar ku ndalohet qarkullimi do të duhet të marrin autorizim në E-Albania. Punonjësit e shëndetësisë, punonjësit e strukturave të shërbimeve kritike, përjashtohen nga rregulli i aplikimit në portalin e-Albania, duke pasur dokumentacionin që vërteton punësimin pranë këtyre institucioneve të mësipërme.
