Ceremonia komemorative do të mbahet sot në sheshin “Skënderbeu”, duke filluar nga ora 08:30. Pas përfundimit të ceremonisë komemorative, kortezhi së bashku me qytetarët do të niset drejt varrezave të Velanisë. Ceremonia do të mbahet me nderimet më të larta shtetërore

Sot varroset njeriu që i kishte dhënë më së shumti Kosovës prej njerëzve të gjallë.

Kishte qëndruar 28 vite burgim për kauzën shqiptare dhe po kaq vite janë mbushur  prej kur ishte liruar.

Adem Demaçi, fitues i Çmimit Saharov për Paqe, ishte liruar nga burgu më 21 prill të vitit 1990, në kohën kur pushteti i Sllobodan Milloshevicit po instalohej në gjithë ish-Jugosllavinë.

Pasi ishte liruar, Demaçi kishte folur për Kosovën, si burgun tjetër më të mëdha, se sa ishte për gati tri dekada.

“Që nga 21 prilli i vitit 1990, ndodhem në më të madhin burg që njeh historia e njerëzimit, në burgun e quajtur Kosovë, ku regjimi hegjemonist-shovinist-terrorist i ka zhveshë më se dy milionë shqiptarë nga të gjitha liritë dhe të drejtat më themelore njerëzore e kombtare”

Ishte dënuar tri herë në tri procese të ndryshme gjyqësore sepse angazhohej për bashkimin e Kosovës me Shqipërinë, kundërshtonte largimin e shqiptarëve për në Turqi dhe luftonte për të drejtat e popullit për vetëvendosje.

Shumherë gjatë procesve gjyësore, Demaçi plot guxim ka marrë edhe përgjegjësi për veprimet që si ka kryer ai. Ai nuk ka hezituar as edhe njëherë të vetme t’i shpreh trupit gjykues qëndrimit e tij kundër regjimit jugosllav.

Në njërën nga seancat gjyqësore Demaçi, veç kishte paralajmëruar ndarjen e Jugosllavisë dhe humbjen e Kosovës.

“Nëse Sërbia do të vazhdojë me këtë politikë ndaj shqiptarëve, një ditë Sërbia ka për t’u bërë shkaktare e shpartallimit të krejt Jugosllavisë dhe në fund do të mbetet pa Kosovën. Kaq!”.

Kështu citohet Demaçi në librin “Adem Demaçi, biografi e paautorizuar”, të autorit Shkëlzen Gashi.

28 vitet e tij brenda mureve të burgut, Demaçit i është privuar çfarëdo privilegji që të burgosurit tjerë kanë pasur. Plot 15 vite, ai nuk ka takuar fëmijët e tij, Abetaren e Shqiptarin.

Në vizitat që i bëheshin në shtëpi nga vizitorë të shumtë Demaçi kishe ende gojën plot me fjalë që i shërbejnë demokracisë e lirisë.

“Njeriu mund të mashtrohet, të burgoset, të vritet, kursë ideja jo. Ideja duhet të jetë pika në të cilën mbështeteni sepse individët mund të gabojnë, mund të burgosen, mund të vdesin…”

“Heroi i Kosovës” i cili sivjet ka mbushur 82 vite mbetet figura më e çmueshme duke pasur bazë veprimtarinë e tij patriotike, politike e intelektuale.

Demaçi pas burgut ishte angazhuar për të bashkim me Shqipërinë, dikur kishte përmendur edhe një konfederatë Ballkanike e njohur si Ballkania. Pak para fundit të luftës ishte bërë Përfaqësues Politik i Ushtrisë Çlirimtare të Kosovës. Kishte kundërshtuar nënshkrimin e Marrëveshjes së Rambujes dhe pastaj ishte larguar nga përfaqësimi i UÇK’së.

Ka pasur raporte të këqija gjithmonë me Ibrahim Rugovën dhe LDK’në. Madje, për ish-Presidentin, Demaci vazhdimisht ka thënë se ishte një pijanc dhe nuk ishte i gatshëm të sakrifikonte për Shtetin.

“Dek….”

Qeveria e Kosovës ka njohur kontributin e tij dhe ka vendosur t’i ndajë një pagë sa të një Ministri.

Demaçi ka vdekur në moshën 82 vjeçare.