SPAK ka dorëzuar zyrtarisht kërkesën në Apelin e GJKKO-së ku kundërshton vendimin e Gjykatës së Posaçme për të liruar ish-kryeministrin Sali Berisha nga masa “arrest shtëpie”.
Dy prokurorët që po hetojnë aferën “Partizani” janë Arben Kraja dhe Enkeleda Minollai, që tashmë dosjen e kanë kaluar në gjykim në GJKKO. Seanca paraprake, nëse do të kalojë ose jo për gjykim, po zhvillohet sot me gjyqtare Flojera Davidhi, e cila i hoqi Berishës masën arrest shtëpie më datë 27 nëntor.
Më datë 30 dhjetor 2023, Gjykata e Posaçme pranoi kërkesën e SPAK për ashpërsimin e masës së sigurisë dhe ndalimit të komunikimit për ish-kryeministrin dhe liderin opozitar, Sali Berisha. Avokati i Berishës tha se ndalimi i komunikimit si privim të lirisë për një deputet dhe e kishte paralajmëruar më herët apelimin e masës.
Sipas vendimit të gjykatës, Berisha urdhërohej që të mos largohet nga banesa e tij si dhe mos të komunikojë me persona të tjerë. Lideri i PD-së po hetohet për korrupsion pasiv në aferën “Partizani”, ndërsa Prokuroria kishte kërkuar që Berisha të ketë kontakt vetëm me personat që jetojnë me të në të njëjtën banesë.
