Akademia Sportive Goga Basket me mbështetjen e Bashkisë së Durrësit gjatë gjithë sezonit të verës ka vendosur në dispozicion të qytetarëve durrsakë fushën e streetbollit. Kjo fushë shërben si mjet argëtimi për të gjithë fëmijët dhe të rinjtë por jo vetëm, çdokush që ka dëshirë të krijojë një ekip për të bërë një ndeshje basketbolli mund të vijë e të luajë në këtë ambient publik sportiv.
Gjatë gjithë ditës instruktoret e Goga Basket janë në dispozicion të fëmijëve dhe të rinjve që duan të argëtohen me lojën e basketbollit. Kjo fushë basketbolli e vendosur në sheshin publik është një mundësi e mirë për t'u argëtuar në mënyrë të shëndetshme pra me sport, por njëkohësisht ky aktivitet i shërben masivizimit të sportit të basketbollit tek moshat e reja si dhe i largon fëmijët e të rinjtë nga rruga dhe lokalet për t'i afruar tek sporti.
Goga Basket së shpejti vjen me ambjentet e reja të Basketbollit, ku çdo prind mund të sjellë femijët të regjistrohen për të bërë stërvitje jo vetëm gjatë verës, por gjatë gjithë vitit. Kompleksi Sportiv i Akademisë Sportive Goga Basket është i pari kompleks privat në Shqipëri dhe plotëson të gjitha standartet dhe kushtet për t'u stërvitur në një ambjent bashkëkohor.
