Moti i keq ka shkaktuar dëme të mëdha në ishujt Kikladhes, duke prekur rëndë Parosin dhe Mykonosin. Reshjet e dendura të shiut dhe breshërit kanë shndërruar rrugët në lumenj, duke shkaktuar rrëshqitje dheu dhe përmbytje të makinave e banesave.
Parosi, epiqendra e përmbytjeve
Në Paros, reshjet intensive për dy orë rresht kanë shkaktuar shembje të segmenteve rrugore dhe fryrje të lumenjve. Rreth orës 17:30, autoritetet ndaluan lëvizjen e automjeteve, duke dërguar një mesazh emergjence për banorët dhe turistët. “Lëvizja ndalohet për shkak të kushteve ekstreme të motit”, thuhej në njoftimin e dërguar nga shërbimi 112.
Mykonosi dhe ishujt e tjerë në alarm
Në Mykonos, pak para orës 19:00, autoritetet lëshuan një tjetër ndalim qarkullimi. Ishulli u godit nga breshër i dendur dhe reshje të forta, duke krijuar rrjedha të fuqishme uji. Stuhia ka prekur gjithashtu Syrosin, Evian dhe Peloponezin, ku priten përmbytje të mëtejshme.
Autoritetet vijojnë punën për menaxhimin e emergjencës, ndërsa u bëjnë thirrje qytetarëve të ndjekin udhëzimet për sigurinë e tyre.
