Ambasadorja amerikane Yuri Kim ka reaguar pas sulmit të shtetasve rusë ndaj 2 ushtarëve shqiptarë në Uzinën e Armëve në Gramsh.

Përmes një postimi në Twitter, ambasadorja amerikane ka bërë të ditur se ditën e sotme ka folur me ministrin e Mbrojtjes Niko Peleshi dhe me Shefin e Shtabit të Përgjithshëm, Gjeneral Brigade Arben Kingjin rreth incidentit që ndodhi mbrëmjen e së shtunës në Uzinën e Përpunimit të Armëve në Gramsh.

“Fola me ministrin e mbrojtjes Niko Peleshi dhe shefin e shtabit Gjeneralin Kingji, duke uruar një shërim të shpejtë për dy ushtarët e plagosur mbrëmjen e shkuar,  duke mbrojtur një objekt ushtarak. Ne qëndrojmë me aleatët tanë ndërkohë që autoritetet vijojnë hetimet e plota për të zbuluar faktet dhe vënë përpara përgjegjësisë ata që janë përgjegjës”, thotë e dërguara e Uashingtonit në Tiranë.