Terroristi i sulmit ndaj “Westminster”-it në Londër ka vepruar i vetëm. Nuk ekziston asnjë informacion që të tregojë se janë parashikuar sulme të mëtejshme. Të paktën kështu kanë deklaruar zyrtarë të “Scotland Yard”.
Masood vrau 3 persona dhe plagosi rreth 50 të tjerë kur drejtoi automjetin drejt turmës së këmbësorëve dhe çiklistëve në urën “Westminster” ditën e mërkurë, përpara se të përplasej me gardhin e Parlamentit britanik dhe të qëllonte për vdekje një oficer policie. E gjitha kjo për 82 sekonda, derisa u qëllua për vdekje nga policia.
Forcat e rendit thonë se me shumë mundësi “ne nuk do ta kuptojmë kurrë se përse e bëri këtë veprim”.
Zv.ndihmëskomisioneri i Policisë, Neil Basu është shprehur se “ende besojnë se Masood ka vepruar i vetëm gjatë së mërkurës dhe se nuk ka informacione, apo raportime nga shërbimet sekrete, që të tregojnë se janë planifikuar edhe sulme të tjera shoqëruese”.
Një 58-vjeçar i arrestuar në Birmingham mëngjesin e parë pas sulmit, bazuar mbi ligjin antiterrorizëm, mbetet ende në paraburgim, ndërsa një 32-vjeçare e arrestuar në Manchester mbetet në liri me kusht, njofton Policia Metropolitane. Fillimisht u arrestuan 11 persona për incidentin, por 9 prej tyre janë liruar pa u ngritur asnjë akuzë ndaj tyre.