Ka shkuar në 17 numri i viktimave pasi një 19-vjeçar hapi zjarr në një shkollë të mesme në Parkland të Floridës.
Atentatori është identifikuar si Nikolas Cruz, një ish-student në këtë shkollë, i cili ishte përjashtuar nga shkolla.
Sherifi i Kontesë Brauard, Scott Israel, u tha gazetarëve se Cruz vrau 3 persona jashtë shkollës, përpara se të hynte në ndërtesë dhe të vriste 12 të tjerë. Ndërkohë, dy persona vdiqën në spital nga plagët e marra.
Me ngritjen e alarmit, policia nisi të evakuonte nxënësit duke marrë me radhë ndërtesat. Pamjet e publikuara në internet tregojnë studentët që po evakuoheshin në grupe të vogla, ndërkohë që policia patrullonte perimetrin e shkollës.
Ky është sulmi më vdekjeprurës nëpër shkolla që kur 26 persona u vranë në shkollën “Sandy Hook” të Konektikatit në vitin 2012.
Ky është sulmi i gjashtë nëpër shkollat amerikane për vitin 2018.
