TIRANE, 1 qershor 2013 – Pas hyrjes në fuqi të ligjit për përgjysmimin e taksës së automjeteve, në Fletoren Zyrtare janë publikuar tabelat, përmes së cilave bëhet përllogaritja e koeficientit të vjetërsisë.
Sipas Gazetës Shqiptare, taksa vjetore e mjeteve të përdorura të transportit është taksë vjetore për çdo vit kalendarik dhe ka vlefshmëri 365 ditë.
Kjo taksë caktohet sipas formulës: Cilindrata në cm3 x koeficienti fiks sipas vjetërsisë x taksa fikse për llojin e karburantit.
Taksa fikse për llojin e karburantit është 12.5 lekë për naftën dhe 10 lekë për benzinën.
Koeficienti sipas vjetërsisë së mjetit përcaktohet në dy tabelat.
Mjetet me vjetërsi nga 0-3 vjet nuk janë subjekt i kësaj takse.
Ndërkohë që “Viti i vjetërsisë” është diferenca ndërmjet vitit kur mjetit i lind detyrimi për të kryer pagesën e taksës, me vitin e prodhimit.
Ligji i ri përcakton gjithashtu se pas vitit të 4-rt të përdorimit, për autoveturat, koeficienti rritet me 0.04.
Afati
Pagesa e taksës bëhet brenda afatit të vlefshmërisë, por gjithnjë para kryerjes së kontrollit teknik vjetor të detyrueshëm të mjetit.
Pronari i mjetit, i cili nuk kryen pagesën e kësaj takse brenda 10 ditëve nga mbarimi i afatit të vlefshmërisë së parashikuar, detyrohet të paguajë një gjobë prej 5% të shumës së detyrimit të papaguar për çdo muaj vonesë, por jo më shumë se 25% për çdo vit.
