Edhe  universitet edhe  Shkollë e Lartë Universitare?!

– Të quash shkencë të aplikuar…  menaxhim biznesi, financë, infermieri

– Kur VKM-ja e Berishës shkelet nga Ministri Tafaj

– S’dihet kush është rektori dhe stafi akademik

 

DURRËS, 5 gusht 2014 –  Grupit arsimor “Talenti” shpk, i famshëm për ngeljen në provim të krejt maturës, i hiqet nga Ministria e Arsimit dhe Sportit licenca dhe për  Shkollën e Lartë Universitare “Akademia e Studimeve të Aplikuara” Durrës.

Edhe  universitet edhe  Shkollë e Lartë Universitare

I vetëquajturi  GRUPI ARSIMOR “TALENTI” kishte në përbërje, sipas statusit në FB (shih poshtë faksimilen e print-screen-it) “parashkollore, shkollë jopublike 9-12-vjeçare e përgjithshme, artistike, gjimnaz me kohë të shkurtuar [ç’është ky  gjimnaz me kohë të shkurtuar dhe  shkollë 12-vjeçare?! – “Dyrrah”-u], universitet, Akademia e Studimeve të Aplikuara “Talenti” [edhe  universitet, edhe  Shkollë e Lartë Universitare “Akademia e Studimeve të Aplikuara”?! – “Dyrrah”-u].

Të quash shkencë të aplikuar… menaxhim biznesi, financë, infermieri!

Dhe si për t’i vënë kapakun, ky institucion privat (Shkollë e Lartë Universitare “Akademia e Studimeve të Aplikuara”) “ofron programe studimi në fushën e shkencave të aplikuara, në degët: menaxhim biznesi, financë, infermieri, duke synuar të sjellë një profil të qartë në tregun e arsimit të lartë shqiptar”.

Mirë një mashtrues dhe i paditur përfshin në shkencat e aplikuara /e  zbatuara  menaxhim biznesi, financë, infermieri, por është për t’u habitur sesi dy politikanë që vijnë nga bota akademike si prof. Sali Berisha (Kryeministër) dhe prof. Myqerem Tafaj (Ministër i Arsimit dhe Shkencës) hedhin nënshkrimet në një Vendim të Këshillit të Ministrave nr. 693, datë 12.10.2011 dhe Urdhër për licencim që “Fakulteti i Shkencave të Aplikuara të ofrojë programet në menaxhim biznesi, financë”.

 “Dyrrah”-u nuk ka ndërmend të fyejë inteligjencën e lexuesve me përkufizimin se ç’është  shkenca e aplikuar /e  zbatuar (anglisht:  the applied science)!

Kur VKM-ja e Berishës shkelet nga Ministri Tafaj

Në faqen e vet, pronari shkruan se “Shkolla e Lartë Universitare “Akademia e Studimeve të Aplikuara” Durrës në nëntor të vitit 2011, filloi funksionimin e saj si institucion i arsimit të lartë”.

Kurse Vendimi (shih faksimilen) i Këshillit të Ministrave, nënshkruar nga Kryeministri Sali Berisha, nr. 693, datë 12.10.2011 “Për licencimin e Akademisë së Studimeve të Aplikuara, Durrës”, i botuar në  Fletoren Zyrtare nr. 150, 10 nëntor 2011, përcakton në pikën 5: “Akademia e Studimeve të Aplikuara, Durrës ta fillojë veprimtarinë mësimore për programet e studimit, të përcaktuara në pikën 3 të këtij vendimi, pasi të ketë marrë, jo më vonë se tri javë para fillimit të vitit akademik, lejen përkatëse nga Ministri i Arsimit dhe Shkencës”.

Pra, i bie që veprimtarinë mësimore ta fillonte në vitin 2012.

Por ish-Ministri i Arsimit dhe Shkencës, z. Tafaj, në  Urdhër nr. 62 (shih faksimilen), datë 17.2.2012, botuar në  Fletoren Zyrtare, nr. 26, 27 mars 2012, sanksionon: “Lejimin e fillimit të veprimtarisë akademike të Akademisë së Studimeve të Aplikuara, Durrës… në vitin akademik 2011-2012”.

Kështu, “bishti” (z. Ministër) rëndon më shumë se “sqepari” (Kryeministri), pasi z. Tafaj ka legalizuar faktin e kryer të privatit me një  Urdhër prapaveprues.

S’dihet kush është rektori dhe stafi akademik

Është e kotë të kërkosh në faqen në internet të kësaj Shkolle të Lartë Universitare Akademia e Studimeve të Aplikuara  me inicialet ASA (lidhje: http://asa.edu.al/asa/staff) se kush bën pjesë në stafin akademik (shih faksimilen e print-screen-it), rektori (http://asa.edu.al/asa/rector), ku botohet një përshëndetje rektori pa emrin e tij.

/th. m. agjencia e lajmeve “Dyrrah”/