Të paktën 15 të vrarë në Gaza, mes viktimave edhe fëmijë! Ministri i Mbrojtjes izraelit njofton pushtimin e “zonave të mëdha”

Mbrojtja Civile e Rripit të Gazës njoftoi sot se të paktën 15 persona, përfshirë fëmijë, u vranë si pasojë e dy sulme izraelite që shënjestruan banesat e qytetarëve.

Sipas tij, dy persona të tjerë u vranë në një sulm tjetër në një banesë në Nuseirat.

Ministri i Mbrojtjes Katz njoftoi pushtimin e “zonave të mëdha” të enklavës

Ndërkohë, ministri izraelit i Mbrojtjes, Yisrael Katz, njoftoi sot zgjerimin e operacionit ushtarak izraelit në Rripin e Gazës me synimin për të kapur “zona të mëdha” që do t’i shtohen zonës së sigurisë që ushtria izraelite ka krijuar brenda enklavës palestineze.

Në një deklaratë, Katz shpjegoi se do të ketë një evakuim në shkallë të gjerë të popullsisë nga zonat ku janë ndezur konfliktet, ndërsa në të njëjtën kohë u bëri thirrje palestinezëve të dëbojnë Hamasin nga enklava dhe të kthejnë pengjet izraelitë, duke shpjeguar se kjo është mënyra e vetme për t’i dhënë fund luftës.

Operacioni ushtarak po zgjerohet për të “eliminuar terroristët dhe për të pastruar zonën prej tyre dhe infrastrukturën e tyre dhe për të kapur zona të mëdha që do të përfshihen në zonat e sigurisë të Izraelit”, theksoi ministri izraelit i Mbrojtjes.

“Unë i bëj thirrje popullit të Gazës që të veprojë tani për të dëbuar Hamasin dhe për të dorëzuar pengjet,” shtoi ai.

Izraeli ka krijuar tashmë një zonë të rëndësishme brenda Gazës, duke zgjeruar zonën që ekzistonte tashmë midis enklavës palestineze dhe Izraelit para luftës, dhe ka shtuar një zonë të madhe sigurie, të ashtuquajturin korridori Netzarim, i cili kalon në mes të enklavës.

Në të njëjtën kohë, zyrtarët izraelitë kanë deklaruar se synojnë të lehtësojnë tërheqjen vullnetare të palestinezëve nga Rripi i Gazës, pasi presidenti amerikan Donald Trump bëri thirrje për largimin e palestinezëve nga enklava në mënyrë që ajo të shndërrohet në një vendpushim bregdetar dhe të vihet nën kontrollin e SHBA.

Më 18 mars, Izraeli rifilloi sulmet ajrore kundër Gazës si dhe operacionet tokësore, pas dy muajsh qetësie relative pas përfundimit të një marrëveshjeje armëpushimi me Hamasin pas ndërmjetësimit të SHBA.
Përpjekjet, të udhëhequra nga Egjipti dhe Katari, për të ringjallur marrëveshjen e armëpushimit nuk kanë bërë përparim.

Që nga 18 marsi, 1,042 njerëz janë vrarë në Rripin e Gazës, sipas të dhënave të publikuara nga Ministria e Shëndetësisë e enklavës të martën, duke e çuar numrin total të vdekjeve që nga fillimi i luftës më 7 tetor 2023, në 50,399.