TIRANË, 10 dhjetor 2013 – Pas lajmit se ministri i Mbrojtjes, Arben Imami, dhe katër zyrtarë të tij do të hetohen për abuzime me fondet publike, një tjetër skandal është në horizont, ai i financimit të gazetës 55 nga Posta Shqiptare, kështu botuesi i gazetës TemA dhe njëkohësisht publicisti i famshëm Mero Baze i është qepur “me bukë në trastë” Mjeshtrit të Madh të Punës (në foton kryesore me presidenti e Republikës, durrsakun Bujar Nishani) Gorea, i dekoruar edhe nga shoqata “Durrësi” me titullin “Arqile Durrsaku”. Drejtori i përgjithshëm ekzekutiv i kompanisë shtetërore “Posta Shqiptare sha” për tetë vite, Arqile Goreja, ka detyruar punonjësit në gjithë vendin të abonohen në gazetën 55, ndërkohë që stafi i kësaj gazete paguhej në borderotë e Postës Shqiptare, thotë Baze në një shkrim të botuar më 10 dhjetor 2013. Përmes një veprimi spekulativ, Gorea sajoi botimin e një fletushke të quajtur “Postieri”, e cila menaxhohej nga gazeta 55 dhe shërbente për të mbuluar një pjesë të shpenzimeve të saj të shtypit dhe pagesës së gazetarëve. Një hetim i shpejtë në borderotë e Postës të tregon se gjithë stafi i gazetës, që nga kryeredaktori e poshtë, paguheshin si këshilltarë ose redaktorë të këtij botimi, shkruan TemA, që boton faksimilen e një shkrese, që urdhëron një punonjëse poste të paguajë detyrimet ndaj gazetës 55, nënshkruar nga një drejtor vendor poste. Ndërkaq tingëllon ironike ajo që shkruan publicisti (Çmimi i OSBE-së) Gjergj Thanasi  për “një precedent të shkurtit 2006, kur prokuroria arrestoi Luiza Hoxhën, ish-deputete e PS-së, ish-prefekte, ish-drejtoreshë e përgjithshme e postave dhe anëtare e KPD-së. Luiza u arrestua, gjykua dhe vuajti dënimin për një dëm të shkaktuar shtetit në vlerën 3 milion e 200 000 euro. Arqile Goreja, drejtori demokrat i postave… pa ngurruar, firmosi shkresën për të kallëzuar në prokurori paraardhësen e tij. Ky është precedenti Goreja. Ky precedent mund të shërbejë fare mirë si manual për Kryeministrin Rama për të shkuar përtej face-lift-it të kryeministrisë te furnizimi me “lëndë të parë” i prokurorisë”. Tabloja bëhet më intriguese në sfond të zërave që qarkullojnë për ndëshkim ligjor të kryebashkiakut aktual të Durrësit Vangjush Dako. Madje, besohet se edhe thirrja e nr. 2 të ambasadës amerikane Henry V. Jardine në takimin me gjimnazistët e “Gjergj Kastriotit” për të denoncuar korrupsionin, ka lidhje me këta zëra. Sikurse dihet, Gorea ka qenë gjithashtu kryetar i bashkisë së Durrësit në vitet 1996-2000. Kurse në Vlorë prokuroria ka paditur Shpëtim Gjikën, kolegun e Dakos dhe Goresë. Gjithsesi, Gorea ka qenë një nga menaxherët publikë më të mirë të administratës së ish-kryeministrit Sali Berisha. 

 
/agjencia e lajmeve “Dyrrah”/