Mbreti i Melburnit vazhdon të jetë Novak Djokovic. Tenisti serb ka triumfuar për herë të gjashtë në karrierë në turneun Australian Open. Numri 1 i botës mundi në finale britanikun Andy Murray me rezultatin 3-0. Djokovic nisi fuqishëm, duke fituar setin e parë 6-1. Në setin e dytë, skocezi reagoi dhe luftoi shumë, por e humbi 7-5 edhe këtë set. Në setin e tretë, Djokovic arriti të fitonte vetëm pas “tie break”. Kështu, pas tri orë lojë, Djokovic fitoi ndaj Murray 6-1, 7-5 dhe 7-6. Me këtë fitore, tenisti serb barazon 11 titujt "grand slam" të fituara nga legjendat Rod Laver dhe Bjorn Borg.