Udhëheqësi suprem iranian, Ayatollah Ali Khamenei, ka paralajmëruar një “përgjigje të fortë” nga Irani në rast të një sulmi amerikan, pas kërcënimeve të presidentit Donald Trump mbi çështjen bërthamore.
Gjatë një fjalimi në Teheran, Khamenei theksoi se Irani nuk do të qëndrojë duarkryq ndaj çdo akti agresioni, duke iu referuar në mënyrë të tërthortë deklaratave të Trump, i cili u shpreh se “do të ketë bombardime” nëse nuk arrihet një marrëveshje bërthamore.
Marrëdhëniet mes dy vendeve janë të tensionuara që nga tërheqja e SHBA-së nga marrëveshja bërthamore e vitit 2015, vendim i marrë nga Trump në vitin 2018. Ndërkohë, administrata e tij ka intensifikuar sanksionet dhe kërcënimet ushtarake ndaj Iranit, duke akuzuar Teheranin për mbështetje ndaj rebelëve Houthi në Jemen.
Irani ka mohuar vazhdimisht akuzat për zhvillimin e armëve bërthamore, duke insistuar se programi i tij është ekskluzivisht për qëllime civile.
