Gjermania është duke verifikuar dhe hartuar një listë të bunkerëve që mund të ofrojnë strehim emergjent për civilët, në një kohë që tensionet në rajon vazhdojnë të jenë në rritje për shkak të konfliktit midis Ukrainës dhe Rusisë.
Sipas burimeve nga Ministria e Brendshme, lista do të përfshijë stacionet e trenave nëntokësore dhe parkingjet e makinave, si dhe ndërtesat shtetërore dhe pronat private.
“Do të hartohet një drejtori digjitale e bunkerëve dhe strehimoreve emergjente në mënyrë që njerëzit t’i gjejnë ato shpejt duke përdorur një aplikacion të planifikuar telefoni. Njerëzit gjithashtu do të inkurajohen të krijojnë strehimore mbrojtëse në shtëpitë e tyre duke konvertuar bodrumet dhe garazhet, – tha zëdhënësi i kësaj ministrie në një konferencë për shtyp.
Ai nuk pranoi të jepte një plan kohor, duke thënë se ishte një projekt i madh që do të kërkonte pak kohë, duke përfshirë Zyrën e Mbrojtjes Civile dhe Ndihmës ndaj Fatkeqësive dhe autoritete të tjera.
Vendi me popullsi prej 84 milionë banorësh ka 579 bunkerë, kryesisht nga Lufta e Dytë Botërore dhe epoka e Luftës së Ftohtë, të cilët mund të ofrojnë strehim për 480,000 njerëz, nga rreth 2,000 bunkerë më parë.
Zëdhënësi tha se pikat kyçe të planit u dakordësuan në një konferencë të zyrtarëve të lartë në qershor dhe një grup i posaçëm po e shqyrtonte atë.
Që nga pushtimi i plotë i Rusisë në Ukrainë në vitin 2022, shqetësimet janë rritur në lidhje me potencialin e Moskës për të synuar anëtarët e tjerë të NATO-s. Në tetor, shefat e inteligjencës gjermane paralajmëruan se Rusia ndoshta do të jetë në gjendje të nisë një sulm ndaj aleancës ushtarake deri në vitin 2030.
Zyrtarët gjermanë thonë se vendi tashmë po përjeton një rritje të mprehtë të aktiviteteve të spiunazhit dhe sabotimit rus. Javën e kaluar presidenti rus, Vladimir Putin, tha se konflikti në Ukrainë kishte karakteristika të një lufte “globale” dhe ai nuk përjashtoi sulmet ndaj vendeve perëndimore.
