Teuta ka zhvilluar dje testin e parë miqësor ndaj Skënderbeut U-19 në Korçë. Një paraqitje e mirë e skuadrës së drejtuar nga trajneri Renato Arapi, që arriti të fitojë me rezultatin e thellë 8-0. “Djemtë e detit” e nisën mirë takimin dhe goli i avantazhit nuk vonoi, me Lorenco Vilën, që në minutën e 5-të, fillimisht godet me kokë dhe topi përplaset në traversë e më pas me këmbë çon topin në rrjetë. 12 minuta pas golit të parë është sërish Vila, i cili me një goditje nga larg shkund rrjetën e vendësve, duke dyfishuar shifrat.
Në minutën e 33-të mesfushori Ledio Beqja përfiton nga një krosim perfekt i Kotobellit dhe mposht portierin me një parabolë mjaft të bukur. Në minutën e 42-të mbrojtësi Idrizaj merr një top në krahun e djathë, depërton bukur në hyrje të zonës kundërshtare, ku kroson në mënyrë perfekte, aty ku Kapllani arrin të ekzekutojë dhe çon rezultatin në 4-0. Pjesa e parë mbyllet me avantazhin e katër golave të Teutës, ndërsa në të dytën trajnerët bëjnë shumë zëvendësime.
Pjesa e dytë foli sërish tërësisht për Teutën. Skuadra blu ishte e vendosur mirë në fushë dhe arriti të gjente golin e pestë me Grudën. Në minutën e 50- të sulmuesi merr një top në fundore, futet në zonë dhe me një goditje të fortë realizon për 5-0.
Më pas skenën e merr sulmuesi Boçi, i cili i shmanget bukur mbrojtjes korçare, del tek për tek me portierin dhe me një goditje të kalibruar shënon golin e 6-të. I riu nuk mjaftohet me kaq, sepse 10 minuta më pas është sërish Boçi, që merr nën kontroll topin dhe me një goditje të fortë e çon topin në cepin e rrjetës për golin e 7-të. Më pas Rigel Tepshi në të 85-ën, realizoi brenda zonës pas një pasimi të marrë nga Boçi, duke vulosur. Një provë mjaft e mirë për Teutën, që të enjten pritet të zhvillojë tjetër miqësore.
Alban Çejku, Patrik Treni dhe David Gjinollari janë lojtarët që po stërviten me Teutën prej ditësh. Dy të parët vijnë nga Tirana U-21, ndërsa mbrojtësi i majtë, Gjinollari, pas aventurës me Burrelin në Kategorinë e Parë. Tre lojtarët ende nuk janë konfirmuar nga klubi, por mund të firmosin në vijim.
