Skuadra e Teutës ka përfituar nga ndërprerja e kampionatit për të zhvilluar një ndeshje miqësore përgatitore ndaj Luzit 2008. Klubi durrsak e ka fituar takimin 2-1 me gola të shënuar nga Ëotlai dhe Myszor. Kjo ndeshje shërbeu si një provë e mirë për stafin teknik të “djemve të detit”, për të parë në veprim disa prej lojtarëve që kanë pasur më pak minuta në kampionat. Trajneri Dobi eksperimentoi gjithashtu me formacione të reja, si dhe të testoi lojtarët e rinj të afruar gjatë merkatos.
Ndeshje të tilla miqësore janë të zakonshme gjatë pushimeve të kampionatit, pasi mbajnë të lartë ritmin e garës dhe ndihmojnë në rritjen e harmonisë në grup.Teuta ndodhet në një fazë ku çdo përgatitje është me rëndësi për objektivat sezonalë. Ndalesa e kampionatit nuk do të jetë aspak periudhë pushimi për Teutën. Skuadra durrsake ka vendosur të shfrytëzojë maksimalisht këtë pauzë, duke zhvilluar dy seanca stërvitore në ditë në kuadër të përgatitjeve për rifillimin e garës. Stafi teknik, nën drejtimin e trajnerit të ekipit, ka hartuar një program të ngjeshur që përfshin stërvitje në mëngjes dhe pasdite.
Ky ritëm intensiv synon të mbajë lojtarët në formën më të mirë për të qenë gati për sfidat vendimtare të kampionatit. Ndalesa vjen në një moment ku Teuta kërkon të ruajë ritmin e fitoreve dhe të përmirësojë aspektet që janë evidentuar si pika të dobëta gjatë javëve të fundit.
Lajme të mira kanë ardhur edhe nga infermieria. Mbrojtësit Jazxhi dhe Kotobelli, si edhe sulmuesi Torraj, të cilët kanë munguar për shkak dëmtimesh, pritet të jenë plotësisht të gatshëm për ndeshjen e fundjavës që Teuta do të zhvillojë ndaj bardhebluve. Rikthimi i tyre është një shtysë e madhe për skuadrën durrsake, e cila kërkon të jetë sa më e plotë në një sfidë mjaft të rëndësishme për ecurinë në kampionat.
