Teuta e pjesës së parë të sezonit 2023- 2024 ka qenë shumë larg pritshmërive të drejtuesve të klubit durrsak. Projekti i nisur me trajnerin italian, Diego Longo, dështoi shumë shpejt dhe palët u ndanë me mirëkuptim, ndërsa më pas klubi i besoi një njohjeje të vjetër, pikërisht Edi Martinit.
Ky i fundit është trajneri më i suksesshëm i historisë së futbollit durrsak, pasi ka fituar gjithçka në krye të Teutës, por tashmë ka marrë përsipër një detyrë shumë të vështirë, teksa i duhet të ringrejë skuadrën. Në 18 javë kampionat “djemtë e detit” e shohin veten në vendin e fundit me vetëm 16 pikë.
Distanca me skuadrën që nuk zbret direkt nga kategoria është 5 pikë, në një kohë që mbeten për t’u zhvilluar edhe dy faza kampionat. Në Durrës nuk e shkojnë aspak nëpër mend që do të luftojnë për mbijetesë, po shifrat janë kundër Teutës dhe nëse bëjmë një krahasim me kampionatin e vitit të kaluar, mungojnë 5 pikë.
Teuta kishte 21 pikë dhe pozicionohej në vendin e shtatë në pjesën e parë të kampionatit të kaluar, ndërsa tani është e fundit me 16 pikë. Mirëpo, ajo që shihet si më shumë problematike në kampin durrsak, ka të bëjë me mungesën e fitores. U bë fiks një fazë e dytë pa asnjë triumf dhe me vetëm 4 pikë të grumbulluara në 9 ndeshje.
Fitorja e fundit e Teutës është në javën e 9-të, kur mposhtën Dinamon 2-3 në stadiumin “Elbasan Arena”. Ekipi durrsak vijon stërvitjen ku trajneri Edi Martini kishte të gjithë grupin në dispozicion, përfshi edhe afrimin e parë të merkato, mbrojtësin Elmandio Gjini.
Deri më tani janë larguar nga Teuta tre lojtarë: Mario Gjata, Aldi Gjumsi dhe Ardit Iljazi. Mirëpo, ka edhe të tjerë që janë në pikëpyetje nëse do të vijojnë pjesën e ngelur të sezonit me “djemtë e detit”.
