Një raport i fundit i publikuar nga The Times pretendon se Mojtaba Khamenei, lideri i ri i Iranit, ndodhet në gjendje të rëndë shëndetësore dhe nuk është në gjendje të ushtrojë asnjë funksion drejtues.
Sipas raportit, që bazohet në një memorandum diplomatik të inteligjencës së përbashkët amerikano-izraelite, Mojtaba Khamenei po trajtohet në qytetin Qom dhe raportohet të jetë pa ndjenja.
Dokumenti, i cili është ndarë edhe me aleatët në rajonin e Gjirit Persik, thekson se ai është në një “gjendje të rëndë” dhe plotësisht i paaftë për të marrë pjesë në vendimmarrjen e regjimit iranian.
Ky zhvillim konsiderohet i rëndësishëm, pasi për herë të parë zbulohet publikisht vendndodhja e tij që nga shpërthimi i konfliktit të fundit, gjatë të cilit besohet se ai mund të jetë plagosur në sulmet fillestare të 28 shkurtit. Megjithatë, nuk ka ende konfirmime zyrtare nga autoritetet iraniane për këtë informacion, çka e bën situatën edhe më të paqartë.
Raporti përmban gjithashtu pretendime edhe më të forta dhe të ndjeshme politikisht. Sipas tij, janë bërë përgatitje për varrimin në Qom të liderit suprem Ali Khamenei, babait të Mojtaba Khameneit.
Ekspertët e çështjeve të Lindjes së Mesme theksojnë se mungesa e transparencës nga ana e autoriteteve iraniane e bën të vështirë verifikimin e këtyre raporteve. Në të njëjtën kohë, publikimi i tyre nga media ndërkombëtare dhe burime të inteligjencës sugjeron një përshkallëzim të luftës së informacionit mes palëve të përfshira. /The Times of Israel/
