Ky është një prej tre rasteve të regjistruara këtë fundjavë, kur drejtuesit e automjeteve të kapur me shkelje kanë tentuar të korruptojnë efektivët e policisë rrugore dhe si pasojë janë arrestuar.

Shoferi: T'u japë vëllai një kafe të mirë?

Polici: Urdhëro?

Shoferi: T'ju japë vëllai një kafe të mirë, pa marrë në telefon.

Polici: Jo. Pse do të më japësh kafe?

Shoferi: Që të iki vëllai jot, mos të lodhesh me këtë punë.

Përveç këtyre tre shoferëve që ofruan në secilin prej rasteve nga 1000, 2000 dhe 3000 lekë për rrugorët për të mos u penalizur pasi ecnin të dehur në timon, u arrestuan dhe 12 drejtues të tjerë mjetesh për shkelje të ndryshme të kodit rrugor.

Në total, në funksion të këtyre kontrolleve përgjatë fundjavës, nga Policia Rrugore e Tiranës, janë :

• Arrestuar në kushtet e flagrancës 15 shtetas, nga të cilët 7 për drejtim mjeti në gjendje të dehur, 5 për drejtim mjeti pa leje drejtimi dhe 3 persona për korrupsion aktiv ndaj personave që ushtrojnë funksione publike.

• Pezulluar 40 leje drejtimi për shpejtësi mbi normat e lejuara.

• Pezulluar 26 leje drejtimi për drejtim mjeti nën efektin e alkoolit.

• Ndaluar administrativisht 105 mjete të cilat rezultuan me detyrime të pashlyera.

• Vendosur 1200 masa administrative për shkelje të tjera të Kodit Rrugor.

Rastet e Mitdhënies:

1.Në rrugën "Xhorxh W. Bush" u verifikua dhe u arrestua në kushtet e flagrancës për veprën penale të korrupsionit aktiv ndaj personave që ushtrojne funksione publike dhe drejtim i mjetit në mënyre të parregullt, shtetasi me iniciale E.A vjeç 28, pasi drejtonte mjetin nën efektin e alkoolit në masën 0.52 mg/l ku gjatë kontrollit policor me qëllim shmangien e penalizimit, drejtuesi i mjetit i ofroi punonjësit të policisë rrugore një kartmonedhë me prerje 1000 leke.

2.Në rrugën "Konferenca e Pezës", u verifikua dhe u arrestua në kushtet e flagrancës për vepren penale të korrupsionit aktiv ndaj personave që ushtrojne funksione publike, shtetasi me iniciale A.B vjeç 36, pasi drejtonte mjetin me targë të modifikuar dhe me qëllim shmangien e penalizimit, i ofroi punonjësit të policisë rrugore një kartmonedhë me prerje 2000 lekë.

3.Në rrugën "Abdi Toptani", u verifikua dhe u arrestua në kushtet e flagrancës për veprat penale të korrupsionit aktiv ndaj personave që ushtrojnë funksione publike si dhe drejtim mjeti në gjendje të dehur, shtetasi me iniciale A.S vjeç 25, pasi nuk iu bind shenjës për të ndaluar, shkeli semaforin dhe rezultoi nën efektin e alkoolit në masën 0.65 mg/l, dhe me qëllim shmangien e penalizimit u ofroi punonjësve të policisë një shumë prej 3000 lekësh.