Më shumë se 30 besimtarë të krishterë janë vrarë brutalisht në veri të Mozambikut gjatë muajit shtator, ku shumicës së viktimave iu prenë kokat nga militantët islamikë. Shteti Islamik i Provincës së Mozambikut (ISMP), një degë lokale e grupit terrorist ISIS, ka marrë përgjegjësinë për disa prej sulmeve më të rënda.
Sulmet ndodhën kryesisht në provincat Cabo Delgado dhe Nampula, dy rajone që prej vitesh janë shndërruar në epiqendra të dhunës islamiste në vend. Banorët vendas raportojnë për fshatra të djegur, njerëz të zhvendosur dhe mungesë të theksuar sigurie në zonë.
Që nga viti 2021, Mozambiku ka marrë mbështetje ushtarake nga vende të tjera afrikane përmes forcave rajonale të Komunitetit për Zhvillim të Afrikës Jugore (SADC), në përpjekje për të frenuar kryengritjen islamiste. Megjithatë, pavarësisht prezencës ushtarake të huaj dhe operacioneve kundërterroriste, vala e dhunës nuk është ndalur.
Organizatat ndërkombëtare të të drejtave të njeriut dhe OKB-ja kanë shprehur shqetësim për gjendjen humanitare në veri të vendit, ku mijëra njerëz janë zhvendosur dhe qindra janë vrarë që nga fillimi i konfliktit në vitin 2017.
