Familjet e katër pasagjerëve që vdiqën në një avion të “Air India”, që u rrëzua në muajin qershor, kanë ngritur një padi në SHBA kundër prodhuesit të aeroplanëve “Boeing” dhe prodhuesit të pjesëve të avionëve “Honeywell”, duke i akuzuar kompanitë për neglizhencë.
Padia e ngritur të martën, e parë nga BBC, tha se ndërprerësit e karburantit me defekt shkaktuan aksidentin dhe akuzoi kompanitë se nuk bënë “asgjë” pavarësisht se ishin të vetëdijshme për rreziqet e projektimit të avionit.
Fluturimi 171 i Air India me destinacion Londrën Gatwick, një Boeing 787, u rrëzua menjëherë pas ngritjes nga Ahmedabad, duke vrarë 260 persona.
Ndërprerësit e karburantit janë bërë një fokus për hetuesit pasi një hetim paraprak zbuloi se furnizimi me karburant i motorëve u ndërpre, pak momente pasi avioni u ngrit nga toka, nga piloti kryesor.
Administrata Federale e Aviacionit të SHBA-së (FAA) ka thënë më parë se çelësat e kontrollit të karburantit në aeroplanët Boeing janë të sigurt.
Prodhuesi amerikan i aeroplanëve nuk komentoi për rastin. Në vend të kësaj, ai iu referua raportit paraprak të hetimit të Byrosë Indiane të Hetimit të Aksidenteve të Avionëve (AAIB) për rrëzimin.
Padia pretendon se të dyja firmat e dinin për rrezikun e një përplasjeje që kur zhvilluan dhe nxorën në treg 787 Dreamliner dhe pjesët e tij.
Familjet thanë se kjo përbënte një “defekt” të projektimit që “lejonte ndërprerjen e paqëllimshme të furnizimit me karburant dhe humbjen totale të shtytjes së nevojshme për të shtyrë” avionin.
Ata thanë: “Dhe çfarë bënë Honeywell dhe Boeing për të parandaluar katastrofën e pashmangshme? Asgjë.”
Boeing dhe Honeywell “qëndruan duarkryq” pas një këshille të butë që thjesht rekomandonte inspektimin e ndërprerësve, thanë familjet, të cilat përfaqësohen nga Firma Ligjore Lanier me seli në Teksas.
Një raport më i detajuar i rrëzimit pritet diku në vitin 2026. Një total prej 229 pasagjerësh, 12 anëtarë të ekuipazhit të kabinës dhe 19 personash në tokë humbën jetën kur avioni u rrëzua.
