Një krizë e re tregtare po merr formë mes Shteteve të Bashkuara dhe Bashkimit Europian, pasi presidenti amerikan Donald Trump ka refuzuar propozimin e Brukselit për eliminimin e plotë të tarifave mbi mallrat industriale, përfshirë automjetet.
Vendimi i Uashingtonit vjen në prag të vizitës së kryeministres italiane Giorgia Meloni në SHBA, duke e komplikuar ndjeshëm axhendën diplomatike. “Është një moment i vështirë, le të shohim si do shkojë,” tha Meloni me ironi para nisjes.
Sipas raportimeve nga Bloomberg, zyrtarët amerikanë nuk janë të gatshëm për heqje të menjëhershme të tarifave, duke preferuar një qasje selektive dhe të balancuar përmes eksporteve dhe investimeve.
Kjo qasje shihet si një sinjal i qartë i politikës proteksioniste të Trump, që mund të minojë përpjekjet e BE-së për bashkëpunim ekonomik dhe ulje të tensioneve.
Meloni shkon në Uashington në një klimë të ftohtë politike, ndërsa në Bruksel po rritet presioni për një përgjigje të përbashkët europiane për të shmangur pasojat afatgjata për ekonominë dhe industrinë e BE-së.
