Turqia është duke u përballur me pikun e dytë të pandemisë me coronavirus për shkak të “pakujdesisë” në dasma dhe organizime të tjera, ka thënë ministri turk i Shëndetësisë, Fahrettin Koca, ndërkohë që po shënohet një numër në rritje i rasteve të të infektuarve dhe të vdekurve me këtë virus.
Duke folur pas takimit që ka pasur me ekipin e tij për koronavirus, Koca ka thënë se kryeqyteti, Ankaraja, ka regjistruar rritjen më të madhe të shifrave të infektimit në ditët e fundit.
Ai ka shtuar se 29,855 punëtorë shëndetësorë kanë qenë në kontakt me virusin deri më tani, teksa 52 prej tyre kanë vdekur.
“Shpërthimi është duke vazhduar. Virusi është duke u përhapur te më shumë njerëz çdo ditë. Numri ynë i testeve po rritet çdo ditë, numri i pacientëve të rinj nuk po bie”, ka thënë Koca.
Numri i personave të prekur nga sëmundja COVID-19, që shkakton koronavirusi, është rritur për 1,596 në 24 orë, duke e çuar shifrën totale të të infektuarve në 273,301 në Turqi.
Numri total i viktimave me koronavirus në këtë shtet është 6,462. /Rel
