Turqia ka përfunduar me sukses zhvillimin e raketës së re balistike ajër-tokë, IHA-230, një armë hipersonike që pritet të rrisë ndjeshëm fuqinë sulmuese të ushtrisë turke, veçanërisht përmes përdorimit nga dronët luftarakë. Raketa është prodhuar nga kompania turke Roketsan dhe përbën një version të avancuar të modelit tokë-tokë TRG-230, e përshtatur për lëshim nga ajri.
Testimi i parë u krye në dhjetor të vitit 2022 nga droni luftarak AKINCI TİHA, i cili e lëshoi raketën nga një lartësi prej 7.6 kilometrash, duke goditur me saktësi një objektiv mbi 100 kilometra larg.
IHA-230 ka një rreze veprimi mbi 150 kilometra, në varësi të lartësisë dhe shpejtësisë së nisjes. Ajo peshon 225 kilogramë, ka një gjatësi prej 3.4 metrash dhe mbart një kokë luftarake 42 kg, e cila mund të jetë fragmentuese, depërtuese ose termobarike, sipas misionit.
Pas nisjes, raketa bie lirshëm dhe më pas aktivizon motorin e saj me karburant të ngurtë. Ajo drejtohet nga një sistem GNSS dhe navigim inercial, duke ofruar saktësi të lartë dhe mbrojtje ndaj ndërhyrjeve elektronike.
Me teknologjinë “zjarr dhe harro”, raketa është dizajnuar për të sulmuar objektiva strategjikë si radarë, qendra komunikimi, automjete të blinduara dhe sisteme të mbrojtjes ajrore, pa pasur nevojë për udhëzim të mëtejshëm nga operatori dhe duke e bërë të vështirë për t’u kapur nga mbrojtja ajrore klasike.
