Rreth 110 000 banorë janë larguar nga Rafahu, në jug të Rripit të Gazës që kur ushtria izraelite mori nën kontroll pikën kufitare në qytet, tha sot Agjencia e Kombeve të Bashkuara për Ndihmën dhe Punët për Refugjatët Palestinë në Lindjen e Afërt (UNRWA).
“UNRWA vlerëson se rreth 110 000 njerëz kanë ikur nga Rafahu duke kërkuar siguri”, tha agjencia e OKB-së për refugjatët palestinezë në një postim në platformën X.
“Por, asnjë vend nuk është i sigurt në Rripin e Gazës dhe kushtet e jetesës janë mizore”, tha OKB.
“Shpresa e vetme është një armëpushim i menjëhershëm”, thuhet në postim.
Sipas autoritetit kufitar palestinez, vendkalimi kufitar i Rafahut me Egjiptin mbetet i mbyllur për dërgesat e ndihmave humanitare.
Ushtria izraelite tha se trupat ishin ende të dislokuara në lindje të Rafahut dhe në Al-Saitun në qendër të Rripit të Gazës.
Të hënën, ushtria izraelite u bëri thirrje banorëve të pjesës lindore në Rafah që të largoheshin nga zona.
Më shumë se 1 milion persona të zhvendosur brenda vendit thuhet se jetojnë në Rafah.
Partnerët perëndimorë të Izraelit, kryesisht SHBA-ja, kanë paralajmëruar qeverinë izraelite për rrezikun e operacionit ushtarak në shkallë të gjerë në Rafah për shkak të pasojave të pritshme dramatike humanitare.
Pas masakrave në Izrael më 7 tetor, Izraeli kërkon të shkatërrojë plotësisht lëvizjen islamike palestineze Hamas, liderët e së cilës dyshon se fshihen në tunele nën Rafah, ku me sa duket mbahen edhe pengjet izraelitë.
