22gusht 2015 – Sajojnë rrëmbimin e vajzës së biznesmenit për t’i marrë 400 mijë euro. Historitë me adoleshentët e kohës së sotme vazhdojnë në Shqipëri në forma të ndryshme. Këtë herë ka qenë vetë vajza 18 vjeçe e një biznesmeni mobilerie, e cila me dy shokë, moshatarë të saj, kanë thurur planin për të përfituar gati gjysmë miliardë lekë. Sipas policisë, të rinjtë kanë sajuar rrëmbimin e vajzës dhe i kanë telefonuar të atit, duke i kërkuar paratë në këmbim të lirimit të saj.
Burime zyrtare nga policia e Tiranës bëjnë me dije se kanë arrestuar 18-vjeçaren me inicialet N.Ç, dhe 2 shokët e saj K.Gj, 19 vjeç, e O.H, 18 vjeç.
Arrestimi i të rinjve u krye pas denoncimit në polici nga 60-vjeçari L.Ç, pronar i një mobilierie në kryeqytet, i cili deklaroi se rreth orës 12:00 të së premtes ka marrë një telefonatë nga një person i paidentifikuar i cili ka kërkuar shumën prej 400.000 euro në këmbim të lirimit të vajzës. Menjëherë ka nisur hetimi i ngjarjes, për të arrestuar pengmarrësit, por familja u trondit kur policia zbuloi se mes autorëve të “rrëmbimit” ishte vetë vajza.
“Më datë 21.08.2015, u arrestuan në flagrancë shtetasit: O.H 18 vjeç, K.Gjore 19 vjeç e N. Ç 18 vjeç banues në Tiranë, pasi në orën 13.00, shtetasi L. Ç, 60 vjeç, banues në rrugën “Irfan Tomini”, ka bërë kallëzim, se në orën 12.00, nga një person i paidentifikuar me telefon i kanë kërkuar 400.000 euro. Nga veprimet e kryera rezulton se në bashkëpunim, kanë stimuluar rrëmbimin e vajzës së mitur N. Ç.”, thuhet zyrtarusht nga policia e Tiranës.
/agjencia e lajmeve “Dyrrah”/
