Legjenda e Manchester United, Ruud Van Nistelrooy, ka deklaruar se Robin Van Persie mundet t’i ndihmojë Djajtë e Kuq ta fitojnë Ligën Premier këtë sezon. Nistelrooy pati shënuar 150 gola gjatë qëndrimit pesë vjeçar të tij në Old Trafford. Ndërsa Van Persie e ka filluar me këmbë të mbarë karrierën e tij te Manchesteri, duke shënuar tetë gola në 13 paraqitje. “Si po luan Van Persie tani, ai po e bën diferencën në shumë raste.
Nëse ai vazhdon kështu gjatë gjithë sezonit, atëherë unë mund ta shohë Manchester Unitedin duke fituar titullin”, ka deklaruar Nistelrooy për The Daily Mirror. “Mendoj se ai është përshtatur shumë mirë te United. Është e rëndësishme për një sulmues që kur të shkojë në një ekip të ri të fillojë të shënojë menjëherë. Kjo gjë i ka ndodhur Robinit. Ai e ka përvojën e Ligës Premier dhe deri tani e ka dëshmuar se ka qenë një përforcim i qëlluar i Manchesterit”, përfundoi ai.
